Laktasi
Laktasaskortur gerir vart við sig hjá meirihluta fólks strax á öðrum áratug ævi þess. Laktasi er mjólkursykurkljúfur, ensím sem breytir mjólkursykri í glúkósa (þrúgusykur) og galaktósa. Þessi minnkun laktasa í líkamanum er eðlilegur þáttur í hrörnun líkamans og gerist án tillits til magns mjólkursykurs í ungbarnafæði.
Starfssemi laktasa á sér stað í smáþörmunum. Ef ekki er nægilegt magn af laktasa fyrir hendi í líkamanum til að brjóta innbyrt magn af tvísykrum í einsykrurnar glúkósa og galaktósa sem eru meltanlegar fyrir líkamann, þá safnast þessar ómeltanlegu tvísykrur upp í þörmunum og draga í sig vatn. Hinar ómeltu sykrur, og sú ólga sem þeim eru samfara, valda ýmsum kvillum svo sem þembu, krampa, vind- og niðurgangi. Þróun slíkra sjúkdómseinkenna veltur á ýmsum þáttum svo sem magni mjólkursykurs í iðrum líkamans á hverjum tíma, hversu oft líkaminn losar sig við úrgang og hversu hratt fæðan berst í gengum þarmana.
Skortur á laktasa er afar útbreiddur meðal allra kynþátta, þó virðist sem hjá sumum einstaklingum, sérstaklega fólki frá norður og vestur Evrópu og afkomendum þeirra handan Atlantshafsins, sé virkni laktasa viðvarandi fram eftir aldri. Þetta fólk getur neytt meira af mjólkursykurríku fæði án þess að einkenni laktasaskorts láti á sér kræla. Hugtakið “mjólkursykursóþol” er oft ranglega notað í staðinn fyrir laktasaskort. Þeir sem sem þjást af laktasaskorti geta þolað eitthvert lágmarksmagn af mjólkursykri, t.d. eitt mjólkurglas en þó kannski ekki tvö, en þeir sem hafa mjólkursykursóþol þola yfirhöfuð ekki neitt sem inniheldur mjólkursykur.
Laktasaskortur er oft ástæða fyrir magaverkjum og síendurteknum kviðarholsverkjum í börnum. Fólk sem lifir á mjög prótínsnauðu fæði þjáist venjulega af laktasaskorti. Laktasaskortur getur verið orsök fyrir óeðlilega lítilli upptöku á kalki í líkamanum, auk þess sem hann getur orsakað mörg vandamál svo sem ofvirkni, asma, nefkvef, minni mótstöðu gegn smitun ýmissa sjúkdóma, ýmsa verki, nýrnasjúkdóma og ákveðna blóðsjúkdóma. Fólk sem þjáist af hreinu mjólkursykuróþoli fær stundum áköf astmaköst.
Í dag eru til ensím í töfluformi sem geta hjálpað til við meltingu laktósa og gera þannig mjólkurvörur aftur að æskilegri fæðu fyrir þá sem áður þjáðust af laktasaskorti. Laktasaensímið heldur virkninni á ferð sinni í gegnum magann á fólki sem þjáist af laktasaskorti. Þannig ætti fólk sem finnst mjólkurvörur góðar en hefur forðast þær sökum laktasaskorts að geta neytt þeirra í hófi. Laktasa töflur eru notaðar rétt áður en laktósaríks mats eða drykkjar er neytt. Töflurnar fást undir nöfnunum Lactogon og Milk digestant.
Upplýsingar þessar eru samansafn fróðleiks um náttúrulegar lækningar. Þeim er ekki ætlað að koma í stað tilmæla eða ráðgjafar fagfólks í heilbrigðisþjónustunni. Sjúklingar á lyfjum, einkum séu þeir haldnir alvarlegum sjúkdómum ættu að ráðfæra sig við lækni áður en þeir hefja neyslu bætiefna.
Senda á Facebook