“Það þarf að búa til nýja sögu og hún þarf að byrja á: Ég elska sjálfan mig, þess vegna vil ég og get ég ...”
Viðtal: Guðrún Kristjánsdóttir
Þorbjörg Hafsteinsdóttir, hjúkrunarfræðingur og næringarþerapisti, hefur haft hljótt um sig upp á síðkastið, en hún sló í gegn með námskeið og nýjar hugmyndir um heilsumál hér á landi fyrir nokkrum misserum. Þó hafa reglulega borist fréttir af Þorbjörgu frá Danmörku, þar sem hún hefur staðið í stórræðum. Hún gaf m.a. út metsölubókina 10 árum yngri á 10 vikum, sem hefur ekki bara vakið mikla athygli þar í landi heldur líka í Noregi, Svíþjóð og Finnlandi og er væntanleg á íslensku innan tíðar. Bókin hefur einnig verið þýdd á ensku og hyggst Þorbjörg fylgja henni eftir í Bandaríkjunum á næsta ári.
Eftir því sem við komumst næst hefur bók Þorbjargar þegar selst í 130.000 eintökum og slær því margri glæpasögunni við.
Ég hitti Þorbjörgu um daginn á fyrirlestri hjá David Wolfe; hún er nýorðin fimmtug og lítur svo sannarlega sjálf út fyrir að vera í það minnsta 15 árum yngri en tölur segja til um. Til allrar hamingju er bók Þorbjargar að koma út hér á landi á hjá útgáfufyrirtækinu Sölku. Reyndar er önnur bók eftir Þorbjörgu á leiðinni og mun koma út um svipað leyti.„Sú bók heitir á dönsku Spis dig yngre og er matreiðslubók með mínum eigin uppskriftum sem henta vel þeim sem velja að fylgja mínum lífsstil og heilsuprógrammi, en flestar uppskriftirnar eru sykur-, glúten- og mjólkurlausar,“ segir Þorbjörg og bætir við: „ Þetta eru einfaldar uppskriftir, enda er markmið mitt að auðvelda konum að aðlaga sig hollum og einföldum lífsstil sem um leið gefur meiri orku, betri meltingu, færri kíló og yngir upp utan og innan.“
Síðan Þorbjörg skrifaði 10 árum yngri á 10 vikum fyrir tveimur árum hefur hún skrifað tvær aðrar bækur, sem eru áðurnefnd matreiðslubók, Spis dig yngre, og svo svokölluð „Boost bók“, eða safakver sem einnig er væntanlega hér landi: „Þessa dagana er ég að þróa og stækka heilsukonseptið mitt. Í nóvember fer klúbburinn minn ClubVital í loftið. Þar verður hægt að finna allskyns fróðleik til innblásturs og hvatningar með það að markmiði að létta fólki að viðhalda hollum lífsstíl í mínum anda. Þarna verða uppskriftir, matarplan, góð ráð og fróðlegar greinar og svo svokallað „panel me“ – með öðrum sérfræðingum, hverjum á sínum sviði, t.d. á sviði lífstílsráðgjafar, hreyfingar, æfinga og jóga. Í gegnum þennan vef verður einnig hægt að afslátt af allskyns hollum og nytsamlegum vörum. Svo stendur til að aðlaga klúbbinn öllum þeim löndum sem bækurnar mínar verða fáanlegar í. Og svo er hitt,“ upplýsir Þorbjörg „að nú er ég að hanna vörur eins og vítamín, superfood (ofurfæðu) og fleira sem verður aðgengilegt og einfalt, en það fer bráðlega á markað. Mottóið mitt er að hafa allt einfalt!“
Þorbjörg á sér marga stóra drauma, sem flestir hafa ræst, og nú kalla Bandaríkin. „Já, ég ætla flytja til Bandaríkjanna í einhvern tíma, nánar tiltekið LA, en ekki þó búferlum heldur til að fylgja bókunum mínum eftir. Og hver veit nema þíð sjáið Tobbu hjá Opruh!“
Snúum nú aftur til jarðar -um hvað snýst bókin 10 árum yngri á 10 vikum, hvað ertu að kenna fólki?
„Annars vegar er ég að kenna fólki hvernig líkaminn starfar eðlilega og hvernig hann er hannaður og hinsvegar hvað við getum sjálf gert til að aðlaga lífsstílinn að þessari frábæru og fullkomnu hönnun sem við erum, svo að við getum látið okkur líða sem best og forðast slit og skaða sem hraðar öldrun. Bókin er byggð upp á 10 vikna prógrammi og hver vika hefur tiltekið verkefni. Ég tek fyrir blóðsykur, meltingu, afeitrun (detox), hormóna, ónæmiskerfi og ekki hvað síst húðina og mataræðið, bætiefni og matarplan. Þetta hefur gefist vel fyrir í það minnsta 130.000 konur!“
Er raunhæft að að „yngja“ líkamann upp á svona skömmum tíma?
„Það tekur vissulega tíma að yngja sig upp en 3 mánuðir á þessu prógrammi orsaka sannanlega breytingar sem hjá mörgum eru nánast kraftaverki líkastar. Og það sést líka stórkostlegur munur á útlitinu. En eftir 10 vikur snýr maður að sjálfsögðu ekki bara aftur í sitt fyrra horf. Min reynsla er sú að vakningin verði fyrir flesta það stór að það sé bara ein leið - að halda áfram og temja sér í framhaldi af því sína eigin persónulegu leið. Matreiðslubókin Spis dig yngre og Boost-bókin eru hannaðar með það fyrir augum að halda áfram.“
Hvernig á „yngingin“ sér stað?
„Með því að oxun og bólgumyndun í frumum minnkar og andoxun og afeitrunarstarfsemi líkamans eflist. Með því að auka insúlínnæmni fruma og gefa hvatberum það sem þarf til að búa til orku úr alvöru mat. Og einnig með því að fjarlægja það sem ekki virkar fyrir líkamann og setja inn það sem virkar og það sem gerir okkur glaðar, léttar og hamingjusamar.“
Þú leggur mikið upp úr hollum mat og ekki síst bætiefnum, af hverju þurfum við að bæta okkur svona margt upp?
„Maturinn er númer 1, 2 og 3 og svo hreyfingin og bætiefnin eru svo einskonar hjálparefni sem geta alls ekki staðið ein og sér. Allt þetta vinnur vel saman og sérstaklega í því umhverfi sem við flest búum við, sem einkennist af streitu, álagi og miklum hraða. Þannig ástand er kræft á næringarefni, til dæmis étur langvarandi streituástand, með mikilli framleiðsu af adrenalíni og kortísoli, upp B9-, B12- og D-vítamín og því miður inniheldur maturinn ekki alltaf allt það sem þarf til. Flestir þurfa að bæta sér upp D-, C- og B-vítamín, sem og fiskiolíu. Þetta er svona grunnurinn. Verstu mistökin sem flest okkar gera er að neyta of mikils sykurs og kolvetna. Það er bókstaflega að tröllríða þjóðinni.“
Það er mikil hráfæðisbylgja í gangi núna. Hvaða augum lítur þú það, hvað gerir hráfæði fyrir okkur?
„Fyrir mér er frábært að hafa hráfæði sem hluta af fæðunni. Ég er sjálf ekki á leiðinni á hráfæði en mér finnst það tilvalið með, enda er það líka hluti af mínu konsepti; ég meina það er svo mikið af hráu grænmeti, möndlum, hnetum og fræjum og ofurfæðu í mínum kokkabókum. En mér finnst mjög mikilvægt, og sérstaklega í okkar loftslagi, að borða það sem okkur var ætlað í upphafi; þar á ég við fisk, fisk og aftur fisk. Ég borða kjúkling líka og stundum villibráð en ég er ekki mikið fyrir rautt kjöt lengur.“
Hvað er gott við íslenska fæðu almennt og hvað ekki?
„Fiskurinn, sölin, lambakjötið, villigrösin, berin. Þetta er alveg hreint frábær matur, sem og íslenska grænmetið. En íslenska mataræðið er jú mjög bandarískt - Texas, djönk, sykur og gosdrykkir - og það mun drepa okkur ef við förum ekki að átta okkur. Kreppan hafði hins vegar athyglisverð áhrif, það sá ég þegar ég var heima í sumar: Það er miklu meira úrval af íslensku grænmeti í boði og það er einmitt það sem þurfti að gerast. Það á að efla íslenska matvælaframleiðslu og það er hægt að gera margt til viðbótar. Ég er með góðar hugmyndir ef einhver vill hlusta!!“
Þú hefur sérhæft þig í næringu kvenna og barna. Að hvaða leyti er það frábrugðið næringu karla?
„Þetta er spurning um áhugasvið. Karlana langar mig bara að kyssa - en ég kyssi heldur ekki hvern sem er. Það er útilokað að ég leggi varirnar mínar á reyk- og hamborgaravarir! Þannig að ég verð sjálfsagt að fara að taka í þá líka!“
Getur hver sem er, hvaða bakgrunn sem hann /hún hefur, gert eins og þú og liðið eins og líkami og sál yngist um tíu ár?
„Ekki spurning! Það þarf bara að taka ákvörðunina!“
Hver er þín framtíðarsýn fyrir okkar hönd?
„Grænt Ísland! Að passa upp á það sem við höfum: Auðlindir okkar, vatnið, loftið og það frábæra fólk sem okkar flotta náttúra nærir. Eins og er hefur stór hluti þjóðarinnar ekki vaknað enn, er i einhverju móki. Mér verður illt þegar ég sé hvað unglingar láta ofan í sig. Ég veit að ég á ekkert erindi þangað og að allir verða að læra á sínum forsendum og það tekur þann tíma sem það tekur. En það má alveg gefa smá í, ekki satt?“
Eru Íslendingar duglegir að taka sig á? Manni virðist stundum eins og þeir séu jafn fljótir að temja sér góðar venjur og slæmar, ef á annað borð er hægt að ná til þeirra?
„Já, það er hörkudugnaður í gangi, það vantar ekki! Við erum náttúrulega langflottust. Það eiga vissulega margir erfitt með að temja sér góðu venjurnar, svona í alvöru. En ég held að þetta sé erfiðast fyrir þá sem eru búnir að semja söguna um sig og sitt líf fyrirfram. Söguna um það hve erfitt það er að lifa í hollustu og hvað það er dýrt, hvað það taki langan tíma að elda holla matinn og svo framvegis og framvegis. Það þarf að búa til nýja sögu og hún þarf að byrja á: Ég elska sjálfan mig, þess vegna vil ég og get ég ...borðað þetta brokkóli“
Að lokum: Ég hef heyrt að þú burstir líkama þinn hátt og lágt og af krafti daglega - segðu okkur frá því og af hverju þú gerir það.
„Ha ha! Jú það er rétt, aðallega vegna þess að burstunin kemur blóðflæðinu svo vel af stað og vekur væga endorfín framleiðsu – og gleði – í taugakerfinu, svo ónæmiskerfið nýtur góðs af. Og svo verður húðin svo æðislega mjúk og flott. Þetta er bara algjörgt dekur sem kostar ekki neitt en gefur svo mikið. Ég nota bursta og/eða hanska og gjarnan gróft epsom-salt og olíu.“
Þetta viðtal birtist í Heilsufréttum í september 2010.
Senda á Facebook